Forsætisráðharrin í Ísrael, Benjamin Netanyahu, hevur boðið anstøðuleiðarunum, Yair Lapid og Benny Gantz, til at koma við í eina tjóðskaparliga savningarstjórn.
Tað sigur flokkurin hjá Netanyahu, Likud, í kvøld sambært Reuters.
Fyrr í dag hevði Lapid boðið sær til at koma við í eina neyðstjórn.
– Eg vil ikki plága meg sjálvan við spurninginum um, hvør hevur skuldina, og hví vit vórðu tikin á bóli, sigur Lapid í einum boðum, hann hevur lagt á X – sum fyrr æt Twitter.
– Vit standa saman mótvegis fígginda okkara, leggur Lapid afturat.
Hann og Benny Gants skipaðu stjórn saman í 2021-2022. Teir vóru forsætisráðharrar upp á skift í eini ógvuliga breiðari samgongustjórn, hvør fremsti felagsnevnari var, at teir vildu halda Netanyahu frá valdinum.
Partarnir royna at nærkast hvør øðrum, nú hernaðarligi palestinski felagsskapurin Hamas leyp so ógvusliga á Ísrael í morgun, sum tey ikki hava upplivað í mong ár.
– Ísrael er í kríggi. Tað verður ikki eitt lætt ella stutt kríggj, sigur Lapid sambært tíðindastovuni dpa.
Í boðunum nevnir hann eisini vandan fyri, at tað kann fara at vera kríggj á fleiri mótum.
Benny Gantz er leiðari í størsta andstøðuflokkinum í Ísrael, Blátt og Hvítt, meðan Yair Lapid er leiðari og stovnari av mið-høgraflokkinum Yesh Atid.
Sammbært ísraelskum sjónvarpi eru minst 200 ísraelsfólk deyð í álopunum í dag.
Ein »týðandi tal« av ísraelum eru tiknir sum gíslar av Hamas. Tað segði ísraelski herurin í kvøld.
Tað eru bæði sivil og herfólk, sum Hamas hevur tikið til fanga og fleiri eru førd til Gazageiran.
Sum svar upp á umfatandi Hamas-álopið hava ísraelsk stríðsflogfør í allan dag bumbað mál í Gazageiranum.
Har boðar palestinska heilsumálaráðið frá í kvøld um 232 deyð.
/ritzau/
