Liðskiparin hjá Manchester United, Nemanja Vidic, fer til Inter Milan, tá kappingin endar í summar.
Tað skriva enskir miðlar, eitt nú BBC Sports.
Serie A risin hevur váttað, at 32 ára gamli miðverjin hevur skrivað undir sáttmála, hóast felagið ikki hevur avdúkað, hvussu langur sáttmálin er.
Vidic váttaði í farna mánað ætlanir sínar um at gevast í Manchester United eftir átta og einum hálvum ári.
Hann kom til felagið í 2006 og hevur leikt fleiri enn 200 dystir fyri Manchester United og verið við til at vunnið fimm Premier League heiti.
- Vidic er ein spælari í heimsflokki. Eg eri ógvuliga fegin um at hava gjøgnumført ein handil sum førir hann til Inter, sigur forsetin í Inter, Erick Thohir.
- Hann er ein av heimsins bestu verjuleikarum, og hansara styrkir, altjóða royndir og útstráling fer at vera eitt stórt pluss fyri liðið, og fer at hjálpa ungu leikarunum. Hann fer at leggja eyka góðsku til felagið og er enn ein partur av stóra Inter liðnum, vit eru í ferð við at byggja, segði Erick Thohir.
