Í morgin, leygardagin 7. desember, verður Nelly Sørensen í Leivsgøtu í Havn 85 ár. Føðingardagin helt hon síðsta leygardag, tá ið tey vóru mong, sum nýttu høvi at heilsa henni og hennara í hølunum hjá Starvsmannafelagnum.
Vøggan stóð í Nólsoy. Foreldrini vóru Sofía fødd Danielsen úr Lon og Niels Nielsen í Liða. Tey fingu seks børn, og Nelly var einasta gentan og ein ordiligur eftirnølari. Elstur var Jacob (1902-1978). Hann var skipari og vitameistari og eitt skifti eisini tingmaður fyri javnaðarflokkin. Næsti drongurin, Karl , doyði sum smádrongur, og so var tað Karl (1909-1990), sum búði í Havn og var skipari. Jóannes (1914-1990) búði í Nólsoy og var útróðrarmaður burturav. Eliesar ella Essa (1918-1991) fór til Danmarkar fyri kríggið. Hann búsettist niðri, men sambandið til Føroya varð varðveitt m. a. tí hann í mong ár sigldi við DFDS skipunum, ið røktu rutuna henda vegin.
Tá ið Nelly nakað eftir krígslok kom til Havnar, arbeiddi hon á Telefonverkinum, sum tá var stórt arbeiðspláss, og har tað var nógv ferðsla. Í høvuðsstaðnum hitti hon Otto Sørensen úr Porkeri. Dámligi, friðarligi og snøggi maðurin arbeiddi fyrstu árini í Skipshandlinum. Seinni var Otto í mong ár álitismaður í fyrisitingini hjá Landsverkfrøðinginum.
Tá ið Nelly og Otto giftust í 1950, fluttu tey í nýggj hús úti í Grønlandi, og har hava tey búð síðani. Tey eiga trý børn: Niels (1952), Sunnva (1956) og Katrin (1963). Tey búgva øll í høvuðsstaðnum. Nelly eigur seks ommubørn og tveir langommusynir.
Í sjeyti árunum fór Nelly í Skipshandilin, og har var hon, inntil hon var farin um pensiónsaldur. At hon er arbeiðssom, røkin og samvitskufull mundi koma arbeiðsplássinum og so mongum øðrum, sum Nelly hevur verið uppi í, til góða.
Heimið hevur altíð verið opið og blíðsskapurin stórur. Í Ebenezer var Nelly millum teirra, sum tóku stór tøk, tá ið nýggjársveitslur og t. d. erv og brúdleyp og føðingardagar vóru, og í Zarepta hevur hon mangan verið í køkinum. Eitt nú hevði hon í mong ár ábyrgdina fyri matgerðini á árligu leguni hjá teimum, sum bera brek.
Trúfesti hevur verið og er stórt. Nelly røkir vinabond, og hon hevur ikki gloymt føðioynna. Í nógv ár vóru tey hvørt summar í fleiri vikur í Nólsoy.
Hjartaliga til lukku á føðingardegnum. Takk fyri alt gott í farnari tíð og alt tað besta verður ynskt tær og Otto og øllum tykkara.
----
Jóannes Hansen
