Ein rakett, sum varð send úr Iran, er skotin niður av loftverjuni hjá NATO í turkiska loftrúminum, skrivar turkiska verjumálaráðið í eini fráboðan.
Talsmaðurin hjá NATO, Allison Hart, váttar í einum uppslagi á X, at NATO enn einaferð hevur skotið eina rakett, sum er ætlað Turkalandi.
Hetta er aðru ferð, at ein rakett úr Iran verður skotin niður av loftverjuni hjá Nato í turkiska loftrúminum.
Turkiska verjumálaráðið upplýsir, at leivdir eru dotnar í einum oydnum øki nærhendis Gaziantep. Ongar fráboðanir eru um deyð ella skaða.
Samstundis sigur ráðið, at Turkaland metir góð grannaviðurskifti og økisstabilitet, men leggur dent á, at landið fer at taka "neyðugu stigini" móti "einhvørjari hóttan móti sínum øki og loftrúmi".
Turkaland hevur verið limur í NATO síðani 1952.
So seint sum leygardagin sendi uttanríkisráðharrin í landinum, Hakan Fidan, eina ávaring til Iran, eftir at fyrsta rakettin varð skotin niður.
– Vit tosaðu við okkara vinir í Iran og søgdu, at um talan var um eina rakett, sum var farin av vegnum, so var tað eitt, segði Fidan, sambært tíðindastovuni AFP, og legði afturat:
– Men um hetta heldur fram, so eru okkara ráð: ver varin, lat ongan í Iran fara undir eitt slíkt ævintýr.
Tvey ónevnd embætisfólk søgdu í síðstu viku við The New York Times eftir fráboðanina um fyrstu rakettina, at rakettin var rættað móti Incirlik flogvøllinum, sum liggur beint uttan fyri býin Adana í Suðurturkalandi.
Á støðini húsast fleiri útlendskar herdeildir, eitt nú amerikanskar og aðrir NATO-sameindar. Amerikanarar hava verið á støðini í áratíggju.
Turkaland hevur avvíst, at loftrúmið hjá landinum er brúkt til at leypa á Iran, sambært blaðnum Times.
Incirlik hýsir sambært Reuters amerikanskum kjarnorkustríðshovdum og hevur verið brúkt til at stuðla altjóða samgonguni, sum berjist móti Islamiskum Stati í Sýria og Irak.
Iransku herdeildirnar hava áður avsannað í eini fráboðan, sum iranskir almennir miðlar hava almannakunngjørt, at teir skutu fyrstu rakettina inn í turkiskt øki.
Enn er eingin fráboðan komin frá iransku síðuni viðvíkjandi fráboðanini um eina aðra rakett, sum er skotin niður í turkiska loftrúminum.
Hendingin mánadagin hendir sama dag, sum amerikanska uttanríkisráðið "harðliga" heitir á amerikanarar í landsynningspartinum av Turkalandi um at fara úr økinum.
Tað skrivar ráðið í dagførdari ferðavegleiðing fyri landið.
/Ritzau/
