Í kvøld er eitt amerikanskt hernaðarflogfar dottið niður í Noregi. Flogfarið var við í einari Nato-venjing, rópt Cold Response. Manningin í flogfarinum taldi fýra.
Flogfarið, sum verður rópt V-22 Osprey, er eitt serstakt hernaðarflogfar, ið flýgur sum eitt vanligt flogfar, men lendir sum ein tyrla. Á veingjunum eru rotorar.
Norska kringvarpið veit at siga, at flogfarið eftir ætlan skuldi lenda fyri klokkan 18 í kvøld, men tá tað ikki var lent, og eingin visti nakað um flogfarið at siga, varð farið at leita.
- Klokkan 21.17 í kvøld hevur leitingin givið úrslit, og nú er rættiliga vist, at flogfarið er dottið niður í einum dali í Beiarn, nakað sunnan fyri Bodø, veit Høvuðsbjargingarstøðin á leiðini at siga.
Tað var VG, sum fyrst skrivaði um hendingina. Enn eru bjargingarfólk ikki komin á staðið. Tað er myrkt, og veðurlíkindini eru vánalig.
- Vit vita ikki enn, um tey fýra fólkini eru í flogfarinum, men vit vita, at flogfarið er dottið niður, sigur miðlatalsmaðurin í bjargingarstøðini, Jan Eskil Severinsen, við NRK.
Lagt verður aftrat, at Grátidalurin liggur sunnan fyri Bodø, og í økinum er skurvut lendi.
Ivar Moen, obertloytnantur og talsmaður fyri venjingina, Cold Response, váttar, at amerikanska hernaðarflogfarið er saknað.
- Flogfarið hevur havt støð í Bodø seinastu vikurnar í samband við venjingarnar, men kom ikki aftur í dag sum avtalað, leggur hann aftrat.
Obertloytnanturin hevur ikki hug at siga nakað um, hvat hann heldur kann vera hent, tí nú verður í fyrsta lagi roynt at koma til staðið, har flogfarið er dottið niður.
##med2##
