Natasja Hammer og liðfelagarnir í Hauki fóru í kvøld stutta teinin úr Hafnafirði til Reykjavíkar fyri at spæla fyrru fjórðingsfinaluna í endaspælinum móti Fram, ið eru verandi meistarar.
Haukar vunnu ein flottan 26-20 sigur, og eru sostatt á odda 1-0 í fjórðingsfinaluuppgerðunum.
Í steðginum var støðan 14-7 til Haukar. Støðan var javnleikur 7-7, og tá megnaðu Haukar at skjóta sjey mál uttan, at Fram megnaði at svara aftur.
Natasja skoraði tvey mál. Stóra hetjan hjá Haukum var Elín Klara Þorkelsdóttir, ið skoraði heili 12 mál.
Komandi hósdag spæla liðini aftur á Hafnarfirði. Haukar kunnu við sigri vinna seg í hálvfinalurnar.
