Amerikanskir myndugleikar vilja vera við, at melduródnin Nargis hevur kravt umleið 100.000 mannalív í Burma
- Upplýsingarnar, sum vit hava fingið, benda á, at talið á deyðum kann vera umleið 100.000 og kanska oman fyri tað, sigur Shari Villarosa, sum er ovasti amerikanski diplomaturin á amerikonsku sendistovuni í Burma.
Melduródnin gjørdi serliga stóran skaða í Irrawaddy-ósanum, og tað er eisini har, at nógv flest mannalív eru farin. Shari Villarosa sigur við amerikanskar fjølmiðlar, at umleið 95 prosent av øllum húsum og bygningum í økinum í og kring ósan eru oyðiløgd, og at støðan hjá teimum, sum framvegis eru á lívi har, er syndarlig.
Útlendskir hjálparfelagsskapir bera ótta fyri, at umfarssjúkur kunnu fara at gera um seg, tí tørvurin á reinum vatni er ovurstórur. CNN sigur, at fólk í tíggjutúsundatali hava einki reint vatn, og tey hava lítið og einki at eta.
Stýrið undir trýsti
ST, ES og USA hava lovað at hjálpa Burma við pengum, men tey hava ikki álit á, at hernaðarstýrið fer at brúka pengarnar til at hjálpa teimum raktu.
Samstundis sýta myndugleikarnir fyri at lata fremmand hjálparfólk sleppa inn í landið. Felagsskapinum av asiatiskum londum, Asean, heitti í morgun á hernaðarstýrið um at taka av tilboðnum um hálp.
- Ein millión fólk mugu fáa hjálp beinanvegin, segði talsmaðurin hjá Asean, Surin Pitsuwan, við Reuters. Hann legði afturat, at fleiri Asean-lond leggja stórt trýst á stýrið í Burma fyri at fáa tað at lata dyrnar upp fyri altjóða hjálp og hjálparfólki.
