Og Bjarni Djurholm, er í loftmiðlunum og bedýrar sítt hjarta til sama Demokratiu.
Ironiskt nokk er Demokratia ein bólkur, sum arbeiðir fyri øktum kvinnuleikluti í politikki, meðan nevndu menn eru fremsta orsøk til, at ongin kvinna er undir teirra lið í landsstýrinum.
So, segði nakar at val var í nánd?
Hvat Hans Pauli og Bjarni leggja í manglandi javnstøðu á tingi og í landsstýri er ikki neyðugt hjá nøkrum at skriva um. Men tað, sum fekk meg at taka til tastaturið í hesum máli er skrivingin hjá Hans Paula Strøm um søgufalsan. Hann leggur í bløðunum Høgna Hoydal undir søgufalsan, tí hann vildi verða við, at tað vóru Lisbeth L Petersen, Heidi Petersen og undirritaða, sum tóku stig til Demokratia.
Tá ein leggur onnur undir so grova ákæru sum søgufalsan, so kundi mann um ikki annað hildið seg til sannleikan.
Hvar rótin til Demokratiu upprennur veit eg ikki. Men í Útnorðurráðnum í 1999 var samtykt ein rekommandatión til frama fyri øktari javnstøðu í londunum í Útnorði.
Henda samtykt førdi so til ráðstevnur á skift í teimum trimum londunum við m.ø kvinnuligum parlamentarikarum úr útnorði, við evnum sum snúði seg um javnstøðu.
Hesar ráðstevnur inspireraðu so føroysku kvinnurnar, sum vóru á seinastu ráðstevnuni, sum var í Føroyum í 2004 til at finna saman sum bólkur og arbeiða víðari við sama evni.
Hesar fóru:
Rúna Sivertsen, fyri Fólkaflokkin
Marjun Olsen/Lisbeth L. Petersen fyri Sambandsflokkin,
Elin Lindenskov fyri Javnaðarflokkin,
Annleyg Lamhauge (eitt skifti Malan Johansen) fyri Sjálvsstýrisflokkin
Annita á Fríðriksmørk og Heidi Petersen fyri Tjóðveldisflokkin
Charlotta á Váli fyri Miðflokkin
Annika Wardum Joensen fyri Javnstøðunevndina
Bjørt Samuelsen sum var skrivari á ráðstevnuni
Vit skipaðu fyri fleiri fundum kring landið. Allir fundirnir høvdu til endamáls at økja um tilvitanina og ynski um øktan kvinnuleiklut í politikki. Arbeiðið var sjálvboðið, og søktu vit tí politisku flokkarnar og onnur um pengar til hvørt einstak tiltak. Vit søktu síðani tað almenna um at fáa pengar til arbeiðið, men tað eydnaðist ikki. Ì staðin sóu vit grundgevingar í okkara umsøkn um pengar aftur í uppskotinum hjá Hans Paula Strøm um at skipa nevnd, sum skuldi arbeiða fyri øktum kvinnupolitiskum leikluti.
Høvuðsmunurin hjá nevndini sum Hans Pauli Strøm setti og nevndini, sum arbeiddi undan hesari er, at Demokratia hevur pengar á fíggjarlógini og er skipa við lóg.
Vit løgdu arbeiði okkara niður, tá ið Demokratia byrjaði. Grundgevingin hjá okkum var, at tað var ongin orsøk hjá okkum sum sjálvboðin bólkur, at arbeiða við júst sama endamálið sum Demokratia. Hinvegin valdu vit allar at stuðla Demokratia, og hava eisini veitt eina - um enn avmarkaða - hjálpandi hond hvørja ferð biðið er um tað.
So, at leggja tað undir søgufalsan, tá ið sagt verður, at onnur enn HPS tóku stig til nevndina Demokratia, er at fara í so lætt um sannleikan.
Leggi ikki í at stríðast um hetta, men fegnist um, at núverandi nevnd, sum hevur sín uppruna í tí, sum var áðrenn, nú hevur pengar at arbeiða við. Hetta vil alt annað líka gera tað munandi lættari at skipa fyri tiltøkum og eini møguligari lýsingarherferð.
Góða eydnu við endamálinum!
