Nú er tað lítið, sum bendir á, at VÍF skal spæla í finalunum um føroyameistaraheitið.
Vestmenningar kundu vinna seg í góða støðu. Næsta vikuskiftið skal VÍF á vitjan í Kollafirði, og tað kundi verði eitt satt oddabrak, um vestmenningar høvdu vunnið, ella bara fingið stig, í gjár.
VÍF søplaði snøgt sagt sigurin burtur. Tá seks minuttir restaðu í, vóru gestirnir úr Vestmanna á odda 37-35.
Neistin vann seg aftur
Neistin vann 38-37. Og aftur staðfestu einaráðandi havnarmenninir, at tað eru í serflokki.
Jugoslav Djumic, David Edvardsen og Finnur Hansson, sum hava verið millum teir mest eyðsýndu í hesum kappingarárinum, skutu trý mál seinastu løtuna, og VÍF svaraði ikki aftur. Og so vann Neistin aftur.
Heimaliðið legði annars bragdligari fyri. Neistin var skjótt á odda við fýra málum, og tann munurin helt sær so at siga allatíðina í fyrra hálvleiki. Eftir steðgin tóktist tað sum, at VÍF visti, at nú mátti røkka ella støkka. Gestirnir løgdu nógv fyri í seinastu royndini at vinna seg í góða støðu í finalustríðnum. Vestmenningar fingu leiðsluna, men tað, sum vendi upp, tá seks minuttir restaðu í, vendi brádliga niður tá avtornaði.
Tað var serliga í verjustøðu, at liðini vóru lítið sannførandi. Tað er sjálvsagt, tá heili 75 mál vóru skotin í alt. Neistin hevur ikki havt nakað at spælt fyri í fleiri vikur, og tað merkist sjálvsagt á avrikinum. Tað sigur hinvegin ikki lítið, at verandi greipuvinnararnir halda fram við síni sigursgongd. Seinastu vikuna hevur Neistin vunnið á bæði KÍF og VÍF, sum eru nærmastu kappingarneytarnir, og sum hava alt at spæla fyri, nú liðini, sum skulu spæla finalurnar, sum finnast.
Møguleikin er lítil
VÍF er framvegis nummar trý við 21 stigum. KÍF, sum vann stórsigur á Team Klaksvík, er nummar tvey við 26 stigum. Átta stig eru eftir at spæla um. Vestmenningar kunnu ikki fáa fleiri enn 29 stig í hesum kappingarárinum. Tað við við øðrum orðum siga, at KÍF manglar fýra stig fyri at staðfesta sítt finalupláss.
KÍF fær vitjan av VÍF næsta vikuskiftið.
