Nú verða Sandoyar- og Eysturoyar­tunnilin veruleiki

Hetta er ein søguligur dagur. Breiða politiska semjan, sum formenninir í polit­isku flokkunum komu ásamt um, er einmælt sam­tykt av løgtinginum í dag. Leingi er tað, ið væl skal vera, sigur orðatakið, tí Eysturoyartunnilin og Sand­oya­tunnilin hava leingi ver­ið á veg, men eg fegnist al­mik­ið um, at tað eydnaðist politisku skipanini at finna eina loysn, ið er kjølfest í løg­ting­inum.

Eysturoyartunnilin
Arbeiði við at útbyggja Eystur­oyartunnilin byrjaði í 2000, tá nakrir einstaklingar í Eysturoynni ætlaðu at gera undirsjóvartunnil mill­um Eysturoynna og Streym­oynna, sum eina pri­vat verkætlan. Ætlanin fekk eitt skot fyri bógvin í 2008, tá fíggjarkreppan byrj­aði. ABDH samgongan helt lív í ætlanini við at festa Eysturoyartunnilin í sam­gonguskjalið­, har æt­lan­in var at royna privata loysn. Eg tók undir við at gera tunnilin privat, treytað av, at tað var á hóskandi støði, tá tað kom til prís. Tá tað ikki eydnaðist, var politiska ynsk­ið at finna eina almenna loysn fyri Eysturoyar- og Sand­oy­ar­tunnil. Eg eri nøgd­ur við loysnina, sum nú er samtykt. Vit, ið búgva í norðurparti av Føroyum, sígg­ja fram til, at koyrandi verður undir Tangafjørð um ­umleið fýra ár.

Breið semja
Tað er ikki at gera ov nógv av, tá eg sigi, at lands­stýris­maðurin hevur gjørt eitt gott arbeiði. Flokk­ar­nir vóru so langt frá hvørj­um øðru­m, at vandi var fyri, at undir­sjóvartunlarnir vórðu av ongum, men Jørgen Nicla­­sen savnaði politisku skip­an­­ina, tá flokkarnir vóru longst frá hvørjum øðr­­um. Eg fegnist almikið um, at tað eydnaðist okkum at finna breiða semju, sum fór tvørtur um flokkar, and­støðu og samgongu soleiðis, at tað er eitt samt løgting, ið fer undir størstu og dýrastu byggi­ætlanina í Føroya søgu.

Framtíðin
Ringt er at spáa um fram­tíð­ina, men tað er mítt størsta ynski, at Eysturoyar- og Sand­oyartunnilin verður veru­leiki. Verkætlanin hev­ur nógvar møguleikar við sær. Tað er eyðsæð. Tí er neyðugt hjá lands- og kom­munu­politik­ar­unum at brynja seg til stóru broytingarnar. Tað er av størsta týdningi, at vit fyrireika okkum til broyt­ingarnar, tí undi­r­sjóv­ar­tunlarnir koma at hava nógv­ar møguleikar við sær, sum land og kommunur mu­gu vera fyrireikaðar uppá.