Av flogvøllinum verður upplýst, at sera nógv fólk hevur ferðast um vøllin fyrra hálvár í ár.
Frá 1. januar í ár til 1. august høvdu 74.233 fólk ferðast um flogvøllin. Sama tíðarskeið í fjør var talið 70.639.
Hetta er ein vøkstur uppá 5,1%.
Nýtt met
Í juli í ár hava 19.838 fólk ferðast um vøllin. Sama mánað í fjør var talið á ferðandi 18.668.
Hetta er sostatt ein vøkstur uppá 6,3%.
Somuleiðis er talan um nýtt met í ferðafólkatalinum, tí hetta er tað mesta, ið nakrantíð hevur ferðast um vøllin í ein mánað.
Reglulig flogferðsla
Summarið hevur ikki verið av tí besta, vilja nógv óivað vera við, men hetta sæst ikki á hagtølunum yvir flogferðsluna í Vágum. Har hevur veðrið ikki tarnað ferðsluni, tí líkindini at flúgva hava verið góð.
Flogferðslan higartil í ár hevur verið ógvuliga reglulig. Fáar, ella so at siga ongar seinkingar hava verið, upplýsa Statens Luftfartsvæsen og Flogvøllurin í Vágum.
