Nýtt bústaðartilboð verður til næmingarnar á Fiskivinnuskúlanum í Vestmanna, tá skúlaárið byrjar aftur eftir summarfrítíðina. Tað eru brøðurnir Jónfinn, Ivan og Hákun Egilsnes í Vestmanna, sum hava tikið stig til at byggja kollegii í Vestmanna.
Inni á Fitjum í Vestmanna arbeiða menn við at innrætta ovaru hædd á einum stórum neysti til bústaðir. Talan er um at gera 6 kømur við tilhoyrandi køki og uppihaldsrúmi, sum skulu hýsa næmingum, ið ganga á Fiskivinnuskúlanum í Vestmanna. Um summarið verða kømuruni leigað út til ferðafólk.
Jónfinn Egilsnes sigur, at hugskotið til hetta tiltakið kom, tá leiðslan á Fiskivinnuskúlanum herfyri sendi eitt skriv út til vestmenningar, har heitt varð á fólk um at hjálpa til at hýsa teimum fremmandu næmingunum, sum komu á skúlan.
Teir hava síðan innrættað ovaru hæddina á neystinum, sum væntandi fer at standa liðug umleið hálvan juni.
Í teimum seks kømurunum, sum vera í húsinum, verður tað, sum ein næmingabústaður í dag hevur brúk fyri. Har verður song, borð stólur og skáp, umframt sjónvarp og linjur til telefon og internet.
Leigukostnaðurin veðru kr. 1.700,- um mánan, sigur Jónfinn Egilsnes. Tá er internethald íroknað, sigur hann.
Talan er um eitt neyst við innrættaðum lofti, og niðara hæddin verður framvegis neyst.
Har fara teir at innrætta eina lítla smiðju, greiðir Jónfinn Egilnes frá. Teir ætla so at bjóða fólki møguleika fyri at taka smærri bátar upp og umvæla teir inni, sigur hann. Staðið liggur væl fyri inni í bátahylinum beint uttan fyri Fossá.
Gamla staðarnavnið her nýggju næmingabústaðirnir eru, er Krákureiðrið, greiðir Jónfinn Egilsnes frá. Og tað navnið hava teir givið bygninginum. So fiskivinnunæmingar í Vestmanna fara í framtíðini at búgva í einum krákureiðri. Og kømurini fara so eisini at fáa navn efir kráku, sigur hann. So sum krákunev, krákubein og kanska krákuvongur.
