Franska oljufelagið Total hevur gjørt enn eitt gassfund vestan fyri Hetland. Hetta sigur felagið frá í tíðindaskrivi. Talan er um eitt fund ikki so langt frá Laggan og Tormore gasskeldunum, sum felagið er í ferð við at útbyggja til framleiðslu. Hesi liggja ikki so langt frá føroyska markinum.
Nýggjasta fundið Edradour kemur væl við hjá felagnum og tess partnara DONG. Total er fyristøðufelag og eigur 75%, meðan Dong eigur hini 25%. Total er júst í ferð við ta fyrstu gassútbyggingina vestan fyri Hetland, sum er mett at kosta umleið 20 milliardir krónur. Fyrsta gassið er væntað í 2014. Í løtuni verður ein risastór gassverksmiðja bygd í Hetlandi at taka ímóti gassinum. At nýggj gassfund verða gjørd í grannalagnum kemur væl við, tí hesi kunnu so bindast uppí høvuðsútbúnaðin á Lagganfeltinum. Tað ger so stóru íløguna tryggari.
Hetta eru eisini góð tíðindi fyri føroyska oljufelagið Faroe Petroleum, sum herfyri fekk tillutað eitt leitiloyvi nærhendis Edraourfundinum, kallað Aileen. Hetta loyvi hevur Faroe Petroleum saman við týska felagnum EON. FP er fyristøðufelag og hava bæði feløgini 50% ognarlut hvør. Graham Stewart, stjóri í Faroe Petroleum er bjartskygdur um Aileen, sum liggur tætt við eitt annað loyvi hjá felagnum, Freya, ið helst verður borað í næstu framtíð. Mett verður at har er heldur olja enn gass.
