Ferðamannaskipið Norwegian Star vitjar á Havnini í dag. Skipið kemur úr Lerwic í Hetlandi og fer víðari til Reykjavík í Íslandi seinni í dag.
Hetta er ferðamannaskip nummar 37 á Havnini í ár, og nú eru bara tvey skip afturat, sum hava boðað frá, at tey koma at vitja Tórshavnar Havn, sum eisini umfatar havnina á Oyrareingjum í Kollafirði.
Mikudagin kemur Viking Star og 7. oktober vitjar Marco Polo aftur, sum er tað seinasta ferðamannaskipið, sum vitjar – ikki á Havnini, men á Oyrareingjum.
Tá hava tilsamans 39 ferðafólkaskip vitjað Tórshavnar Havn í ár – og tað er munandi færri enn í fjør, tá 63 skip vitjaðu.
