Tað er ikki serliga long bíðitíð eftir at verða lagdur undir skurð fyri sjúkur og brek í rygginum.
Tað staðfestur Sirið Stenberg, landsstýriskvinna í heilsumálum.
Kári P. Højgaard, løgtingsmaður, vildi hava at vita frá henni, hvussu leingi tað er hjá sjúklingum við trupulleika í rygginum, at sleppa undir skurð.
Sirið Stenberg sigur, at er talan um bráðneyðuga skurðviðgerð, er ongin bíðitíð, men annars er bíðitíðin tvær til fýra vikur í miðal.
Er talan er um størri skurðviðgerðir, er bíðitíðin eina tvær vikur og tær viðgerðirnar fara fram á sjúkrahúsinum í Glostrup.
Í fjør vórðu 57 føroyingar skurðviðgjørdir í rygginum og av teimum vórðu 17 skurðviðgjørdir á Landssjúkrahúsinum, har útlendskur rygglækni arbeiðir eina viku um mánaðin.
Hinir 40 vórðu lagdir undir skurð í Danmark. Av teimum vórðu 28 sjúklingar lagdir undir skurð á privatum sjúkrahúsi, føroyska heilsuverkið hevur avtalu við, og 12 vórðu viðgjørdir á sjúkrahúsinum í Glostrup.
Annars staðfestir Sirið Stenberg, at føroyska heilsuverkið rindar bara fyri viðgerðir uttanlands, sum yvirlækni í føroyska heilsuverkinum hava sent avstað.
Og teir kunnu bara senda sjúklingar á viðgerðarstøð, sum føroyaska heilsuverkið hevur avtalu við og skulu sjúklingar sendast aðrastaðni, krevst serloyvi til tað.
- Tískil ber ikki til at geva endurgjald fyri viðgerðir, sum sjúklingurin sjálvur útvegar sær. Orsøkin til hesa skipan er, at heilsusverkið má tryggja sær, at tað eru skipað viðurskifti á økið, og at viðgerðirnar, tað almenna keypir uttanlands, eru nóg góðar, sigur Sirið Stenberg.
