Fyri næstan einum mánaði síðan gjørdist greitt, at Kenny Rogers ikki kom til Føroya kortini. Alt var annars klárt. Atgongumerki vóru seld og høllin bíløgd. Men brádliga gjørdist greitt, at fyriskipararnir saman við sínum umboðið ikki høvdu rindað fitt av peningi, og tí varð greitt, at ongin konsert bleiv við Kenny Rogers í høllini á Hálsi 17. og 18. septembur.
Eftir tað, tók mikið stríð seg upp millum fyriskipararnar og umboðið, og fyriskipararnir vilja draga umboðið fyri rættin.
Mitt í øllum málinum vóru fólkini, sum longu høvdu keypt atgongumerki. Fóru tey at fáa peningin aftur?
Boðini vóru 14. juli, at fólk skuldu senda atgongumerkini til eina postboks, áðrenn 1. august, og so skuldu pengarnir koma.
- Tað sær gott út nú. Næstan øll hava fingið pengarnar aftur, sigur Hans Jørgen Djurhuus, sum var ein av fyriskiparunum.
Burturblivnir pengar
Tað var eitt sindur av rumbli, um ikki fyriskiparar og umboðsmaður høvdu nýtt peningin fyri atgongumerkini til lívsins uppihald. Men hesum vísir Hans Jørgen Djurhuus partvíst aftur.
- Umboðsmaðurin fór við onkrum pengum, men upphæddirnar eru ikki so stórar. So við at spýta eitt sindur í sjálvir, so er trupulleikin loystur, og øll fáa sínar pengar aftur, staðfestir Hans Jørgen Djurhuus.
Nær ella um rættarmál verður millum Sp/f Holmen og umboðsmannin, er ikki enn endaliga greitt, men málið koyrir sína gongd.
Kassi
Norðurlond avlýst
Upprunaliga var ætlanin, at Kenny Rogers skuldi hava fleiri konsertir í Norðurlondum í septembur. Upprunaliga var tað Sp/f Holmen, ið skuldi skipa fyri øllum hesum, men eftir eitt sindur av tíð, seldi Sp/f Holmen allar konsertirnar, uttan tær í Føroyum.
Fyri næstan einum mánaði síðan, vórðu Kenny Rogers konsertirnar í Føroyum tiknar av skránni, og tá Sosialurin hyggur í dag, kann staðfestast, at øll Norðurlond eru avlýst.
