Ný sælendingurin, Darryl John Keenan, sum eftirhondini er vorðin kendur á klettum okkara, hevur aftur verið í Føroyum og roytt seyð. Hann steðgaði her nakrar dagar á veg úr Svøríki til Íslands, har hann skal royta einar 10.000-15.000 seyðir fyri íslendskar bóndur. Úr Íslandi fer hann niður til Sardiniu.
Um tað er rætt at siga, at maðurin hevur verið her og roytt, er ilt at siga. Gamla orðið fyri at taka ullina av seyði, er at royta. Orðið røkkur helst langt aftur um tíðina hjá saksinum og óivað eisini aftur um tíðina hjá knívinum. Men útgerðin, sum Darryl nýtir, er nútímans og kommersiell, og tí er tað ein spurningur, um orðið at ?royta? í veruleikanum kann nýtast.Tað kunnu onnur taka støðu til.
Betri seyður
Tað vóru bóndahjúnini, Katrina og Jógvan Svarthamar á Skælingi, sum ynsktu, at Darryl kom fram við, nú hann steðgaði í Føroyum. Tey gera nógv burtur úr seyðinum og hava alt fest á blað, sum hevur við seyðin at gera. Seyðurin hjá teimum lembur inni, og tí vildu tey royna, um góðu royndirnar hjá eitt nú íslendingum eisini kunnu vísa seg aftur her hjá okkum, um seyðurin verður royttur fyri lembing.
- Eg haldi, tað vera áhugavert, at fólk tora at byrja nakað nýtt. Og skulu slíkar royndir gerast, er hóskandi, at tær verða gjørdar á garðinum hjá Katrinu og Jógvani, tí tá fáa vit eitt álítandi úrslit, sigur Jóannes Patursson, bóndi.
Ný sælendingarnir plaga at búgva hjá honum í Kirkjubø, tá ið teir eru í Føroyum.
Hesaferð er Darryl John Keenan í Føroyum saman við tveimum øðrum fólkum, eini ullakonu sum tey kalla og einum manni. Sjálvur býr Darryl ikki hjá Jóannesi hesaferð, men tað gera hini bæði.
- Darryl hevur vitjað higar á hvørjum sumri í eini 4-5 ár , og eg havi so hjálpt honum og øðrum, sum hava verið her, við ymiskum viðurskiftum, eitt nú við at fáa arbeiðsloyvi.
Jóannes sigur, at roytingin á Skælingi er ein roynd at fáa betri seyð í Føroyum.
- Tey á Skælingi vildu fegin royta nakað av seyði undan lembing. Nógv úrslit benda á, at seyður, sum verður royttur undan brundstíð og lembing, verður betri og úrtøkan størri. Íslendskar royndir vísa, at fleiri egg loysna í seyði, sum er royttur undan brundstíð. Á henda hátt fáa ærnar fleiri lomb.
Nú er tað ov seint til hesar royndir, men íslendsku royndirnar vísa eisini, at royttur seyður etur og mjólkar meira, og tí verður spennandi at vita, um lombini, sum lembd verða í vár, verða betur fyri enn annars.
Í Íslandi verður seyðurin vanliga royttur tvær ferðir um árið, í mars/apríl og í september/oktober; í Føroyum vanliga bara um summarið. Onkur bóndi í Føroyum roytir tó meira enn ta einu ferðina.
- Skal seyðurin hava góða ull, er fyrsta stigið, at hann verður royttur tvær ferðir um árið; tá slepst eisini undan lesullini, sigur Jóannes Patursson.
Hann vísir á, at seyðahúsini, sum menn hava bygt sær, eru tøtt, og tí kann seyðurin, sum gongur inni, saktans gerast ov heitur, um hann ikki verður royttur ? ja, hann kann fáa fepur.
- Hesar somu royndir hava íslendingar eisini gjørt sær. Ikki fyrr enn teir byrjaðu at klippa seyðinum tvær ferðir um árið, fingu teir góða úrtøku av at hava seyðin inni undir lembing, sigur Jóannes Patursson.
Stórur kapasitetur
Á Skælingi roytti ný sælendingurin umleið 80 seyðum, og tað tók honum bara einar tveir tímar.
Hesi seinastu 4-5 árini hevur hann roytt seyð fyri føroyskar bóndur kring meginpartin av landinum, og soleðis verður helst eisini, tá ið hann kemur heimaftur á klettarnar í summar.
- Tað er ikki smávegis, kapasitetur ein slíkur maður er. Hann roytir einar 40-50 seyðir um tíman. Í Føroyum eru tvær el-maskinur, sum keyptar eru til endamálið, og hesar eigur Royndarstøðin í Kollfjarðadali. Hetta er tað, sum kallað verður professionell útgerð til royting av seyði.
Jóannes sigur, at ein slíkur maður sum Darryl roytir einar 40.000-50.000 seyðir um árið í ymiskum londum.
- Nú Darryl kom higar úr Svøríki, høvdu teir roytt umleið 4.000 seyðir har yviri. Á Sardiniu skal liðið, hann er partur av, royta umleið 50.000-60.000 mjólkseyðir, sigur Jóannes Patursson, sum væntar, at Darryl John Keenan fer at royta einar 1500-1600 føroyskir seyðir í summar.
