– Í roynd og veru er hetta eitt sindur ræðandi at fáa ein spurnig, sum henda.
Tað helt Annita á Fríðriksmørk, løgtingskvinna fyri Tjóðveldi, hendan dagin, fíggjarlógin fyri næsta ár var til umrøðu í Løgtinginum.
Og spurningurin, hon heldur er eitt sindur ræðandi, er um at gera undirsjóvartunnil til Suðuroya.
Bjarni Hammer tingmaður fyri Javnaðarflokkin, vísir á, at samgongan leggur stóran dent á at tryggja haldførið í búskapinum. Ein máti at gera tað upp á, er at seta pening í ein búskapargrunn. Og hann vildi hava at vita frá Annitu á Fríðriksmørk, hvat hon heldur um at ein stórur partur av tí, sum stendur í búskapargrunninum verður markað til at gera tann komandi Suðuroyartunnilin fyri.
– Tað er ein útreiðsla, sum fer at koma fyrr ella seinni, sigur Bjarni Hammer. Hann heldur, at tað hevði styrkt verkætlanina munandi við tað, at eginpeningurin hevði verið nógvur og tað hevði eisini bøtt um møguleikarnar at fingið fígging til verkætlanina við eini rentu, sum hevði verið lægri enn hon annars hevði verið.
Men Annita á Fríðriksmørk heldur, at nú mugu vit ikki verða ov hástór, tí nú skulu vit anda inn og slappa av eina løtu. Hon vísir á, at vit eru í holt við tveir dýrar undirsjóvartunlar og hon heldur, at tað er dekan ov tíðliga at fara at tosa um at gera ein Suðuroyartunnil eisini, samstundis sum Eysturoyartunnilin og Sandoyartunnilin eru í gerð.
Hon heldur, at tað er ræðandi, at Bjarni Hammer er so ótolin, at hann vil hava gongd á Suðuroyartunnilin, samstundis sum at hinir báðir undirsjóvartunlarnir verða gjørdir.
Hon vísir á, at endamálið við at seta pening í ein búskapargrunn er fyri at hava nakað at standa ímóti við, tá ið tíðirnar versna, og hon heldur, at tað endamálið eiga vit avgjørt at halda okkum til.
– Tað hevur ómetaliga stóran týdning, at búskapargrunnurin verður brúktur til at bjálva okkum við ímóti ringum tíðum, heldur hon.
Annita á Fríðriksmørk segði, at Suðuroyartunnilin hevur ikki verið til umrøðu í samgonguni yvirhøvur, og tí undrar tað hana, at hann er so frammaliga í orðaskiftinum.
– Lat okkum taka tað róligt og gera Eysturoyartunnilin og Sandoyartunnil fyrst. Og lat okkum eisini fáa teir goldnar, áðrenn vit fara at tosa um undirsjóvartunnil til Suðuroyar eisini, sigur hon.
Her kann viðmerkjast, at lánini til Eysturoyartunnilin og Sandoyartunnilin hava eina avdráttartíð upp á 24 ár, varð upplýst tá ið tey vórðu tikin.
