Okur eiga Smyrol siga suðuroyingar, og sandoyingar munnu meina seg eiga Teistan. Men ilt er hjá nólsoyingum at gera krav upp á Ternuna á sama hátt, alla tað tíð, hon er fyrstaval sum avloysaraskip hjá Teistanum.
- Ternan er lívæðrin hjá nólsoyingum, men alt ov ofta kemur fyri, at skipið fer í sigling aðrastaðni, ella at ferðaætlanin ikki verður hildin. At nólsoyingar hava so óálítandi ferðasamband millum heimbygdina og Havnina, kann Tórshavnar kommuna ikki góðtaka, sigur Annika Olsen, borgarstjóri í Tórshavnar kommunu, sum hevur sent Strandferðsluni og Samferðslumálaráðnum eina áheitan um at finna eitt annað avloysaraskip beinanvegin, so at Ternan burturav kann røkja Nólsoyarfarleiðina.
- Hvønn morgun gerandisdagar fara einir 60 nólsoyingar frá húsum og sigla um fjørðin til Havnar til arbeiðis og í skúla. Øll onnur ørindi, sum vit vanliga taka fyri givið, skulu nólsoyingar til Havnar at avgreiða. Tí hevur tað alstóran týdning, at fólkið í oynni kann kenna seg trygt við farleiðina, sigur Annika Olsen. Hon sigur, at Jósup, sum verður settur inn í sigling í staðin, er ov lítil, og tað kemur meiri enn so fyri, at fólk standa eftir.
- Tað er greitt, at hetta er ikki ein haldbar støða. Tórshavnar kommuna vil, at familjur trívast bæði í býi, bygdum og oyggjum í kommununi. Vit vita, at álítandi ferðasamband er avgerandi fyri, at fólk vera verandi í oynni, og at nýtt fólk flytur í oynna, sigur Annika Olsen, sum harmast um, at fólkatalið í oynni í dag eru 40 fólk færri enn fyri 10 árum síðani. Í dag búgva 218 fólk í Nólsoy.
- Skulu vit varðveita mentanarliga fjølbroytni í kommununi og í øllum Føroyum, mugu landsmyndugleikarnir sýna eina størri virðing fyri farleiðum, har sjógvur skilir oyggjarnar, sigur hon.
- Fari at heita á avvarðandi myndugleikar um, at Strandfaraskip Landsins finnur eitt annað avloysaraskip beinanvegin, soleiðis at barnafamiljur og onnur í Nólsoy fáa ta sjálvsøgdu tænastu, at tey kunnu líta á ferðaætlanina og soleiðis sleppa til arbeiðis, í skúla, kunnu heinta børnini á dagstovni eftir arbeiðstíð og annars gera øll onnur ørindi í meginøkinum. Ternan eigur at verða álitið hjá nólsoyingum, og til tess at liva upp til hetta skal skipið røkja Nólsoyarleiðina burturav, sigur Annika Olsen.
