Eitt lágtrýst í ein útsynning úr Íslandi fer í ein landnyrðing og eitt tilhoyrandi brúgvalag við regni og vindi kemur inn yvir Føroyar av útsynningi og fer framvið mánadagin. Lágtrýstið sjálvt fer fram við Føroyum týsdagin í ein útnyrðing úr Føroyum saman við nógvum vindi og ælaveðri. Mikudagin kemur aftur eitt brúgvalag inn yvir Føroyar av suðri.
Í dag verður andøvsgul upp í ein strúk av landsynningi, sum seinni øtlar í stívt andøvsgul upp í hvassan vind, 10 til 15 m/s, av landsynningi. Tað verður skýggjað og regn. Um kvøldið lækkar hann í ein sunnan og sum frá líður slítur í. Um náttina øtlar hann vindin í strúk í vindi upp í skrið av útsynningi, 13 til 18 m/s. Tað klárar í, tó verður okkurt æl. Hitin alt samdøgrið millum 9 og 13 stig.
Týsdagin øtlar hann vindin í hvassan vind upp í skrið av útsynningi, 15 til 20 m/s, sum út á kvøldið og náttina makar niður í andøvsgul upp í ein strúk, 8 til 13 m/s. Fyrrapartin ælaveður, seinni fyri tað mesta turt og sólglottar. Hitin alt samdøgrið millum 9 og 13 stig.
Mikudagin verður gul til stívt andøvsgul , 5 til 10 m/s, sum út á dagin snarar í ein sunnan og um náttina makar niður í fleyr til gul av ymsum ættum, undir 5 m/s. Turt og sógllottar, men seinnapartin skýggjað og regn. Hitin alt samdøgrið millum 10 og 13 stig.
Hósdagin verður fleyr til gul av ymsum ættum, undir 5 m/s, sum út á dagin snarar í ein eystan og øtlar vindin í andøvsgul upp í ein strúk, 8 til 13 m/s. Um náttina snarar hann vindin í ein útsynning og øtlar upp í strúk í vindi í hvassan vind, 13 til 15 m/s, í støðum upp í skrið, 18 m/s. Tað verður skýggjað og regn og hitin alt samdøgrið millum 9 og 13 stig.
Fríggjadagin verður stívt andøvsgul upp í hvassan vind av útsynningi, 10 til 15 m/s, um náttina makar hann vindin í andøvsgul upp í strúk í vindi, 8 til 13 m/s. Fyri tað mesta skýggjað og regn av og á. Hitin alt samdøgrið millum 8 og 12 stig.
Leygardagin verður andøvsgul upp í ein strúk av útsynningi, 8 til 13 m/s. Sólglottar, men eisini okkurt æl. Hitin alt samdøgrið millum 8 og 12 stig.
