Týskvøldið 18. januar var skipað fyri einum valkvøld í »Klubb 188«, sum ungdómshúsið í Hoyvík eitur, har veljast skuldi eitt ungdómsráð. 12 ung vóru í uppskoti, men einans fimm skuldu veljast. Tá atkvøðurnar vórðu taldar, so bleiv ungdómsráðið manna við tveimum, úr 6. og 7. flokki og trimum úr 8. flokki og eldri.
Ungdómsráðið fer at hava tætt samstarv við samskiparan, har tey fara at bera ynskir frá teimum ungu fram.
Tað fyrsta sum verður á skránni verður enn eitt fjølbroytt DJ og VJ SHOW, hetta verður longu leygarkvøldið 29. januar 2011 í »Klubb 188«. Opið verður frá kl. 21.00 - 02.00. Kostnaður: 50 krónur. Tað verður nógv ymiskt spennandi á skránni, eitt nú kann nevnast at DJ verða: Pandaboy, Sunflower og DJ Neiz. Eisini verður eitt stórt surprice, so tað er nógv at gleða seg til.
Ungdómshúsið í Hoyvík hevur fingið eina sera góða byrjan upp á 2011. Bygnaðurin í ungdómshúsinum er broyttur nakað, soleiðis at tað nú er aldursmark á fríggjakvøld og leygarkvøld, og tey hava økt um upplatingartíðirnar og hava nu opið tríggjar ferðir um vikuna. Samstundis er Bjarni Beder settur sum samskipari í Klubb 188 frá 1. Januar. 2011.
- Vit gleða okkum til eitt spennandi 2011, har tey ungu fara at seta sín dám á ungdómsvirksemi. Alt virksemi í KLUBB 188 fer fram í rúsfríum umhvørvi og aldursmarkið er frá 13 til 18 ár, sigur Levi Mørk, leiðari.
