Tað var øgiliga javnt og spennandi, tá ið B71 í kvøld var gestur hjá NSÍ við Løkina.
NSÍ vann 4-3 eftir 2-2 í fyrra hálvleiki.
Tríggjar ferðir megnaðu sandoyingar at svara aftur, eftir at heimaliðið legði seg framum.
Fýra minuttir undan leikloki skoraði Hans Marius Davidsen til 4-3, og tað varð úrslitið, men tað var tætt við, at B71 enn einaferð javnaði, tí í tíðini, sum dómarin legði aftrat, var um reppið, at Símin Hansen javnaði til 4-4.
Báðir partar høvdu havt góðar málmøguleikar, áðrenn Atli D. Petersen í 18. minutti legði NSÍ á odda 1-0.
Clayton Soares javnaði til 1-1 í 26. minutti, og bara tríggjar minuttir seinni legði Jann Martin Mortensen heimaliðið framum 2-1. Henda støða helt sær inntil í síðsta minutti undan steðginum. Tá javnaði Brian Okpala til 2-2.
Sjey minuttir eftir steðgin var tað Pætur Turiðarson Skipanes, sum legði NSÍ á odda 3-2. Clayton Soares var aftur upp á spæl seks minuttir seinni, og 3-3 var støðan, inntil tað restaðu fýra minuttir og NSÍ skoraði sigursmálið til 4-3.
NSÍ er næstfremst við 17 stigum, og B71 hevur nú 11 stig – sama stigatal sum B68 og KÍ.
Í níggjunda umfari eigur NSÍ heimavøll ímóti 07 Vestur, og tá fær B71 vitjan av KÍ.
