Røntgendeildin á Landssjúkrahúsinum hevur skift gamla mammografin út við ein nýggjan digitalan mammograf.
- Krabbameinsfelagið fegnast um, at eitt av tilmælunum í Krabbameinsætlanini, at útvega ein nýggjan mammograf, nú er veruleiki, skrivar Krabbameinsfelagið á sínari heimasíðu.
Mammografur er eitt av tólunum, sum verður brúkt at kanna fyri bróstkrabba.
Marius Rasmussen, leiðandi yvirlækni á Røntgendeildini, heldur, at hetta fer at broyta munandi um myndagóðskuna og veita sjúklingum skjótari og greiðari diagnostisering. Hann sigur, sambært heimasíðuni hjá Krabbameinsfelagnum, at hetta er eisini ein markering av, at Røntgendeildin arbeiðir nú digitalt, og at røntgenfilmar og myrkarúm eru farin í søguna.
