Norðskáli: Tað er langt til næsta klædnahandil, og tí hevur Anna Maria Zachariasen sett sær hetta fyri at lata upp ein handil miðskeiðis í landinum.
Hon hevur sjálv arbeitt í 10 ár í Handilskjarnanum í Havn, men hevði nú hug at royna okkurt nýtt og fyri seg sjálva.
- Eg hevði hug at royna við einum handli her norðuri, tí eg haldi at tað er tørvur á einum slíkum handli í hesum økinum, sigur Anna Maria.
Hon hevur longu merkt til áhugan hjá fólki fyri handlinum. Tað skilst á henni, at tey eisini eru sera positiv og ikki minst spent til tann 29., tá handilin letur upp.
Hvønn einasta dag koyra túsundtals bilar eftir brúnni um Streymin, og í økinum, har handilin hjá Onnu Mariu er, liggur frammanundan ein stórur matvøruhandil og ein kaffistova.
- Tað eru ikki øll, sum keypa í Havn. Nógv koma eisini út á bygdirnar at keypa, so tí vænti eg mær eisini kundar aðrastaðni frá, sigur ein spent Anna Maria.
Í Brá fer at bera til at fáa barnaklæðir, ungdómsklæðir og annars klæðir til kvinnur. Harraklæðir eru eingi enn, men nakað av skógvum verður selt her.
- Kanska tað kemur seinni, sigur hon.
