SEV
Klokkan 04 í morgun fór norska kaðalskipið Nautilus Maxi undir at leggja ein nýggjan sjókaðal av Raktanga í Eysturoy tvørtur um Tangafjørð og inn á Sandvíkar á Streymoy.
Klæmint Weihe, stjóri í SEV, sigur, at nýggi kaðalin er partur av nýggja 60 kV sambandinum millum verkið í Skálafirði og Sundsverkið.
- Frammanundan bindur ein 20kV kaðal verkini saman, men við nýggja kaðalinum verður trygdin á hesum partinum av netinum hjá SEV nógv størri.
Stjórin sigur, at úr Skálafiðri og úteftir vestursíðuni á Skálafjørðinum liggur nýggi kaðalin í landsvegagerðini, sum er í gond har, og av Sandvíkum og inn á Sund liggur hann saman við rørunum hjá Fjarhitafelagnum.
- Alt hetta er planlagt í góðari tíð, sigur Klæmint Weihe.
Íløgan hjá SEV í henda henda partin av kaðalsambandinum millum verkið í Skálafirði og Sundsverkið er einar 20 miljónir krónur.
Nýggi kaðalin er framleiddur á kaðalverksmiðjuni Nexans í Noregi, og felagið hevur fingið Seløy Dykkerservice at leggja sjókaðalin millum Raktanga og Sandvíkar.
- Nýggi kaðalin er ein eykapulsæðr á el-netinum, og nýggja 60 kV sambandið hevur eitt nú til endamáls at halda veitingartrygdina á sama høga støði alt árið. Hetta hevur eisini týdning, tá árligt eftirlit skal gerast á stóru mastrunum kring um á fjøllunum.
Sev-stjórin væntar, at spenningur verður settur á nýggja el-kaðalin um ein mánaða ella so.
- Veðrið hevur verið gott, og arbeiðið hevur gingið væl, sigur Klæmint Weihe.
Teinurin millum Raktganga og Sandvíkar liggur um stívliga 6 kilometrar.
