Ingeborg Vinther, forkvinna føroysku arbeiðaranna í mannaminni, Jan Højgaard, fiskimannafelagsformaður og Kartni Ravnsfjall úr Starvsmannafelagnum eru stýrislimir í ALS. Tey seta stjóra, og tey áseta lønina hjá stjóra – saman við hinum limunum: Alfred Petersen, advokati, Maritu Rasmussen, stjóra í Vinnuhúsinum, og Viberg Sørensen, reiðara.
Tey hava valt, at stjórin í ALS skal hava eina góða millión í løn. Hann fekk í fjør 1.083.000 krónur. Árið fyri fekk hann eitt sindur meira. Hetta svarar til 8,5 arbeiðsleys fólk.
Løgið, at fakfeløg ganga á odda at gera stjórar til milliónerar, tá tað ikki ber til á almennum stovnum annars –?har politikarar og ikki fakfelagsleiðarar ráða. Ikki ein gong løgmaður fær so feita løn.
Løgmaður fær »bara« 57.250 krónur um mánaðin pluss 7.000 kr í skattafríum borðfæ. Hann hevur ein ársløn upp á 686.908,80 krónur. Rokna vit borðfæið uppí, so fær løgmaður eina ársløn upp á 771.500 krónur.
Ergo: Skalt tú hava eina feita stjóraløn innan tað almenna, so fá tær fakfeløg til arbeiðsgevara – og ikki politikarar!
