Telefonbókin 1999 við teim hvítu og gulu síðunum er komin, og verður næstu tvær vikurnar borin út til hvørt húski í Føroyum.
Nógv viðskiftafólk hava vent sær til Føroya Tele við uppskotum til broytingar í Telefonbókini. Okkurt er tikið til eftirtektar, annað verður goymt til seinni útgávur. Størsta broytingin í nýggjastu útgávuni er uttan iva, at hvítu síðurnar eru býttar í sjey økisyvirlit: Suðurstreymoy, Norðurstreymoy, Vágar, Eysturoy, Norðoyggjar, Sandoy, og Suðuroy. Brúkararnir nýtast ikki at villast í hesum nýggja yvirlitinum. Á síðu 52 er fullfíggjað yvirlit á Føroyakorti.
Í mun til útgávuna, sum kom út síðsta vár, eru hvítu síðurnar, ið hesa ferð eru fremst í bókini, øktar við 49 síðum og tær gulu við 10 síðum. Minnisbløðini, ið nógvir brúkarar hava saknað, eru nú aftur at finna í bókini.
Í ár er Telefonbókin gjørd av Teleforlagnum, sum er ein deild av Føroya Tele. Bókin er prentað í 37.000 eintøkum hjá Oddi hf. í Reykjavík. Allir telefon-, fax- og fartelefonfelagir fáa bókina, men tað ber eisini til at keypa hana í telebúðunum kring landið og á Tænastumiðstøðini fyri hálvt hundrað krónur eintakið. Næsta telefonbókin kemur út næsta ár.
