Í dag verða tveir dystir í 19. umfari í Betri deildini hjá monnum. Á Argjum spæla AB og TB, og við Margáir er vandi fyri, at tveir landsliðsmálskjúttar sita uttanfyri. Andreas Lava Olsen hevur leikbann, meðan Arnbjørn T. Hansen er ivasamur.
Les eisini: Lukasz er vrakaður
Heimaliðið er í síni bestu gongd í longri tíð, eftir at liðið hevur vunnið tríggjar ferðir upp í slag, og hevur lagt seg undir liðina á ÍF á stigatalvuni. Faktist hevur EB/Streymur vunnið fýra av teimum seinastu seks dystunum í landskappingini, men bæði tapini hava verið stór. Millum annað tapti EB/Streymur 6-0 móti júst Vikingi 2. august.
Í dag verður EB/Streymur uttan Gest B. Dam og gøtumannin, Fannhard A. Skoradal, sum báðir eru farnir av landinum. Ein annar fyrrverandi víkingur í EB/Streymi, Magnus Heinason, hevur trupulleikar við knænum og spælir heldur ikki.
Les eisini: Dysturin um niðurflytingarstrikuna
Arnbjørn T. Hansen skoraði trý mál í síni tíð á landsliðnum. Eitt av teimum kom eftir innskifting móti Írlandi á Tórsvølli. Hann hevur seinnu árini havt sama leiklut, sum vit mangan síggja Andreas Lava Olsen í. Leirvíkingurin bleiv skiftur inn á Tórsvølli móti Malta í Nations League herfyri, og skoraði. Hann hevur tó leikbann í dag, eftir at hann fekk sítt fjórða gula kort í hesum kappingarárinum í 2-1 sigrinum í Fuglafirði.
Hetta verður eisini fyrsti dysturin hjá nýggja venjaranum, Jóhan Petur Poulsen. Hann tekur við eftir Eyðun Klakstein. Sum In. fo hevur skrivað fyrr í dag, so er Lukasz Cieslewicz vrakaður til dystin í dag. Fyrr í vikuni bleiv samstarvið við Vukasin Tomic endað. Sostatt fáa teir ungu ábrygdina í dag, og tað hava teir fyrr gjørt væl móti júst EB/Streymi í hesum kappingarárinum.
Liðtíðindi:
EB/Streymur:
Ikki við: Gestur B. Dam (farin av landinum), Magnus Heinason (knæ), Fannhard A. Skoradal (farin av landinum)
Ivasamur: Arnbjørn T. Hansen
Víkingur:
Ikki við Andreas Lava Olsen
Betri deildin menn – 19. umfar:
Sunnudagin 13. septembur:
AB-TB (15.00) Beinleiðis á FM1
EB/Streymur-Víkingur (15.00)
Týsdagin 15. septembur:
Skála-KÍ (19.00)
Mikudagin 28. oktober:
HB-NSÍ
ÍF-B36
