Sambært forsætisráðharranum í iraksku fyribilsstjórnini verður Saddam Hussein latin iraksku myndugleikunum innan fjúrtan dagar.
-Um Guð vil, byrja rættarmálini ímóti Saddam Hussein og hinum, so skjótt tað letur seg gera, sigur Alawi við sjónvarpið Al-Jazeera.
Amerikonsku myndugleikarnir hava ikki váttað tíðindini, men ein embætismaður segði í gjár, at vilja irakar hava gamla einaræðisharran, fáa teir hann.
Saddam Hussein hevur verið fangi hjá amerikanarunum, síðani hann varð tikin tann 13. desember. Roknað verður við, at hann kemur fyri ein serdómstól í Irak. Herfyri samtykti irakska stjórnarráðið at seta deyðarevsing aftur í gildi í serligum førum. Tí kann Saddam fáa deyðarevsing, verður hann funnin sekur í at hava forfylgt shiamuslimunum í áttati- og nítiárunum. Hann verður ætlandi eisini ákærdur fyri krígsbrotsverk í sambandi við álopið á Kuwait.
