SANDOYARTUNNIL: - Vit eru á einum máli um, at tilgongdin við Sandoyartunlinum hevur verið trupul.
- So leingi sum verkætlanin ikki verður løgd í fasta legu, verða framhaldandi politiskir trupulleikar av hesum málinum.
Tað halda í øllum førum fýra av politisku feløgunum í Sandoynni Sandoyar Sýslu Sambandsfelag, Sandoyar Sýslu Fólkafloksfelag Sandoyar Sýslu Javnaðarfelag og Sandoyar Sýslu Tjóðveldisfelag.
Tey hava nevniliga sent út eina yvirlýsing, har tey vísa á drúgva málið, sum enn ikki er loyst samstundis sum fólkatalið í oynni minkar.
Fyri tey er eingin ivi um, at tað er bert EIN loysn sum kann venda gongdini og tað er Sandoyartunnilin.
Víst verður á, at játtanin til ein komandi tunnil verður lítið meiri enn til verandi ferðasamband, eins og at landið kann spara pening í longdini um pengar verða settir av longu nú.
- Vit heita tí á landsins politikkara um at stovna p/f Sandoyartunnilin sum skjótast, og at peningur av álvara verður settur av í hesum valskeiðnum.
So verður sligið fast: At nú er nokk tosað. Nú vilja vit síggja úrslit, siga tey fýra politisku feløgini í Sandoynni.
