Fyrsta slagið um Havnina í hesum kappingarárinum verður sunnudagin.
Neistin og Kyndil spæla í høllini á Hálsi. Tá hava flestu liðini somuleiðis lagt fyrsta fjórðingin av hondbóltsárinum aftur um seg.
Neistin er farin buldrandi avstað. Við fimm sigrum eru fremstir, trý stig niður til nærmasta kappingarneytan. Eingin hevur stolið stig frá Neistanum enn. Nú sleppur Kyndil at royna seg.
KÍF skal reisast
KÍF legði væl frá landi. Seinastu tveir dystirnir hava hinvegin bara givið eitt stig.
Sunnudagin spæla kollfirðingar og StÍF í høllini í Kollafirði. Uppgávan hjá Jan Ottesen, venjara, og hinum er nú at koma aftur á beint aftaná flúgvandi byrjanina. Eydnast tað ikki, og Neistin vinnur, so fánar spenningurin burtur um ovasta plássið fyribils.
H71 hevur vunnið seinastu tveir landskappingardystirnar, og hoyvíkingar eru greiðir favorittar, tá Team Klaksvík vitjar í Hoyvík.
