Leygardagin 29. februar verður kappingarárið 2020 av álvara skotið í gongd, tá árligu Stórsteypadystirnir hjá kvinnum og monnum verða spældir á Tórsvølli.
Tað er føroyameistararnir og steypavinnararnir frá í fjør, sum møast. Og í ár eru tað fremstu kvinnuliðini og mansliðini hjá KÍ og HB, ið bresta saman um Lions Steypini. Stórsteypadysturin hjá kvinnum byrjar klokkan 16:00, meðan menninir fara á vøllin klokkan 19:00.
Til Stórsteypadystirnir kunnu luttakandi liðini fremja upp til fimm útskiftingar. Ágóðin frá dystinum fær Lions Club at lata til vælgerandi endamál.
