Tvær tær fyrstu kappingarnar í ár vann Nevið Reyða. Tá sá tað ikki so ljóst út hjá sigursvanda Argjabátinum.
Á jóansøku glapp hjá argjamonnum, sum eisini vunnu fyri einari viku síðani, tá ið tað varð kappast í Fuglafirði.
Ta ferðina var tað í sjálvum startinum, at klaksvíkingar umborð á Nevinum Reyða mistu tað mesta av einari bátslongd. Í dag var øðrvísi. Starturin hjá Nevinum Reyða var góður.
Men tað var skjótt, at Argjabáturin vann seg ein skut framum, og so vóru tað argjamenn, sum stýrdu róðrinum. Eina løtu var munurin tað mesta av einari bátslongd. Í endaspurtinum hevði Nevið Reyða av álvara hug at bjóða av, men teir megnaðu ongantíð at hótta Argjabátin, sum harvið vann fyri triðju ferð á rað, og sum nú – fyri fyrstu ferð í ár – er fremstur í FM kappingini.
1 Argjabáturin 5:17.25
2 Nevið Reyða 5:19.13
3 Miðvingur 5:43.48
4 Sjóriddarin 6:08.08
