Í lufthavnini Sola í Stavanger í Noregi kemur skjótt ein sonevndur "mussikrókur", har fólk, sum eru mussisjúk - við fráferð ella komu - kunnu stilla seg at mussast. Hetta verður samstundis fyrsti mussikrókur av sínum slag í Noregi.
Norska heimasíðan www.vg.no skrivar, at mussikrókurin verður "avskermaður", og hann verður litaður ljósareyður, eins og stillur tónleikur fer at ljóma í krókinum.
Heimasíðan skrivar, at mussikrókurin skal gera fráferð - og komu - minni truplar fyri trygdareftirlitið á flogvøllinum.
- Fólk vena seg, gráta og mussast áðrenn trygdareftirlitið, soleiðis at proppur kemur í. Tað er veruliga brúk fyri, at fólk hava høvi og stundir at siga farvæl, sigur Morten Sand, sum hevur ábyrgdina av upplivingum, sum ferðandi og gestir annars fáa í Sola lufthavnini í Stavanger.
VG spurdi eisini Morten Sand, um leiðslan á flogvøllinum ikki stúrir fyri, at fólk fara at taka sær onnur "ting" fyri í mussikrókinum, men tað verður ikki, sigur hann.
- Har verður eingin hurð, og tí verður mussikrókurin ikki heilt privatur heldur, leggur Morten Sand aftrat.
