- Ungdómur, menning og mentan!
Jógvan í Skorini, borgarstjóri á Eiði, sigur, at hetta er tað, størsti denturin verður lagdur á, nú fíggjarætlanin fyri næsta ár er samtykt.
Í hesum sambandi hevur bygdaráðið samtykt at seta 300.000 krónur av til ein leiðara fyri ungdómstiltøkum, trivnaðartiltøkum og ferðavinnu.
- Hann skal fyrst og fremst skipa fyri tiltøkum og skapa trivna í kommununi. Men hann skal eisini skipa fyri tiltøkum í sambandi við ferðavinnuna, sigur borgarstjórin.
Kommunan setir eisini 500.000 krónur av til fyrsta byggistig av einum mentanarhúsi.
- Ætlanin er at byggja gomlu fimleikahøllina um til framførslur og tiltøk, við venjingarhølum, sum musikskúlin eisini fer at brúka.
- Musikskúlin, sum ikki hevur havt nóg góðar umstøður, fær við hesum virðilig hølir, og Eiðis kommuna fær sín egna mentunarmiðdepil, sigur borgarstjórin.
Annars heldur verkætlanini at gera fótbóltsvøll niðri í Hólma fram, og hálvonnur millión verður sett av til endamálið næsta ár.
Fyrr í ár vórðu útlitini fyri Eiði ikki so góð, men nýggjastu inntøkumetingarnar frá Taks, nú síggja munandi betur út.
Fíggjarætlanin er upp á 19,3 milliónir, men kommunan heldur fast um skattaprosentið, sum er 20,75 prosent.
Barnafrádrátturin er 7.500 krónur fyri hvørt barnið, sum í løtuni er tann triðhægst í landinum, sigur borgarstjórin.
Myndina tók Erik Christensen.
