Umleið 30.000 fólk gingu í morgun kravgongu í høvuðsstaðnum í Myanmar, Yangon, har tey kravdu, at tað harðrenda hernaðarstýrið skal leggja frá sær.
Fremstir í kravgonguni gingu fleiri hundrað buddhistiskir munkar. Síðani í síðstu viku hava teir gingið kravgongu í Yangon, og uttan at siga eitt orð hava teir lagt stórt trýst á hernaðarstýrið, sum teir vilja hava frá.
Í gjár valdu munkarnir at fara til húsini hjá andstøðuleiðaranum, Aung San Suu Kyi, sum hernaðarstýrið setti í húsavarðhald. Í 1990 vann flokkur hennara tjóðartingsvalið, men hernaðarstýrið ógildaði valið beinanvegin.
Politiskir eygleiðarar í Asia siga, at mótmælini hjá teimum buddhistisku munkunum koma hernaðarstýrinum sera illa við, og endin kann gerast, at generalarnir noyðast frá. Munkarnir eru høgt í metum ímillum fólk, og spurningurin er, hvussu leingi teir vanligu hermenninir megna at standa ímóti trýstinum.
