Okkara støða í grindamálinum hevur verið alt ov defensiv. Vit mugu hava eitt mótspæl til umhvørvisfelagsskaparnar, og tað skal fyrst og fremst koma frá Uttanríkisráðnum.
Vit eiga at leggja dent á tríggjar lutir í okkara mótspæli. Vit mugu vísa á, at stovnurin av grindahvalum er ikki hóttur, at grindadrápið er ein føroyskur mentanararvur, og at drápið verður gjørt so gott og skjótt sum gjørligt. Vit mugu eisini tora at hyggja at skipanini kring grindadrápið - lúka tær vánaligu hvalvágirnar frá, og til dømis lata roynd fólk skera á háls.
So leingi sum ein meiriluti av føroyingum er fyri grindadrápi, so kunnu vit ikki steðga tí. Men hinvegin vil eg siga, at tað skal vera ein meiriluti fyri grindadrápinum, annars eiga vit at gevast.
Vit mugu leggja eina ætlan fram til næsta summar, tí vit kunnu ikki seta okkum afturá, lata sum luft og verða fornermað inn á altjóða fjølmiðlar.
