Undirskotið hjá Heilsutrygd er so stórt, at nú er landsstýrið farið at kanna møguleikarnar fyri at minka um undirskotið.
Tað upplýsti Jørgen Niclasen, landsstýrismaður í fíggjarmálum, nú Løgtingið hevur samtykt at játta meiri pengar til Heilsutrygd.
Sum støðan er nú, verður mett at Heilsutrygd má fáa 13,8 milliónum afturat í ár fyri at fáa javnvág ímillum útreiðslur og útreiðslur við tí virksemi, sum nú er. Sostatt verða útreiðslurnar í ár eini sjey prosent hægri enn tær vóru í fjør.
Ein orsøk til gongdina, er, at fólkatalið er nógv hækkað hesi seinastu árini, men ein onnur orsøk er at vit hava fingið fleiri kommunulæknar.
Frá januar 2014 til januar í ár, er fólkatalið hækkað næstan 4.000 fólk, og av teimum eru 1.100 fókk eldri enn 67 ár.
Landsstýrið sigur, at hvørja ferð ein kommunulækni verður settur í starv afturat, økir tað um útreiðslurnar hjá Heilsutrygd, tí næstan allar veitingar hækka
– Hesi seinastu trý árini eru tríggir kommunulæknar settir í starv afturat, ein á Eiði, ein á Skálafjørðinum og ein í Hoyvík.
– Hesar nýggju kommunulæknaviðtalur øktu nógv um útreiðslurnar í 2018 og 2019, og mett verður, at útreiðsluvøksturin heldur fram í ár, sigur Landsstýrið.
Tí sigur Jørgen Niclasen at landssýtirmaðurin í heilsumálum, Kaj Leo Holm Johannesen er farin at kanna, um tað ber til at bøta um støðuna í Heilsutrygd.
– Tað eru tveir møguleikar, antin at hækka inngjaldið, ella at skerja tilskotini til heilivág, sigur landsstýrismaðurin í Fíggjarmálum.
