Robert Mugabe, forseti í afrikanska landinum, Zimbabwe, skrivaði í gjár undir eina nýggja grundlóg, sum gevur møguleika fyri, at nýval kann verða skrivað út seinni í ár.
Grundlógin varð samtykt við fólkaatkvøðu í mars mánaði, og hon skerjir valdið hjá forsetanum og avmarkar eisini, hvussu leingi framtíðar forsetar kunnu verða sitandi sum forseti.
Nú verður tann avmarking galdandi, at ein forseti bara kann verða valdur í tvey skeið, men av tí at lógin ikki er við afturvirkandi kraft, sleppur Mugabe at verða sitandi hetta skeiðið út.
Sostatt kann hann longja síni higartil 33 ár sum valdsharri í Zimbabwe við tíggju árum aftrat, so hann kann halda sín 99 ára føðingardag í forsetasessinum, skrivar Reuters-tíðindastovan úr Harare.
