Í morgun staðfestu fólk hjá Mowi, sum hevur aling á Sandsvág og júst er í holt við tøku, at hol var á tøkubúrinum, sum liggur fram við grótkastinum. Stjórin í Mowi Føroyar, Hans Jákup Mikkelsen, sigur, at einir 20.000 laksar eru mistir.
- Hetta er fiskur, sum vigar umleið fimm kilo, so missurin svarar til umleið 100 tons - ella einar fýra miljónir krónur. Tað er stórt spell, at hetta hendi, nú tað annars hevur gingist so væl við alingini á Sandsvág í hesum umfari.
Stjórin í Mowi vísir á, at tað hevur verið nakað av ókyrru í sjónum, bæði í gjár og síðstu nátt, og hann væntar, at tað er hetta, sum er orsøkin til, at hol er komið á nótina í tøkubúrinum.
Hans Jákup Mikkelsen leggur dent á, at tað er einki galið við aliringunum, tí teir hava ligið væl úti á vánni, síðan fiskur varð settur út í september í fjør. Tað hevur gingið væl við alingini og fiskurin, sum Mowi higartil hevur tikið, er fantastiska vakur og góður.
- Higartil í heyst hava vit tikið eini 1400 tons, og eini 600 tons eru nú eftir at taka. Vit hava riggað okkum til tøku á bryggjuni á Sandi, og higartil hevði alt gingið væl. Tað er tí stórt spell, at hetta nú hendi, sigur Hans Jákup Mikkelsen.
Hann leggur aftrat, at í løtuni seta einir tríggir bátar gørn eftir mistum laksi, og hann leggur aftrat, at nógvur laksur er at síggja inni í havnini á Sandi. - Vit eru komnir suður við gørnunum, og nú verður roynt at fáa fatur í so nógvum sum tilber.
Hans Jákup Mikkelsen heldur, at ein orsøkin til, at laksurin, sum Mowi hevur alt á Sandsvág, er so góður, eitt nú hevur sína orsøk í, at her er eingin lús at snakka um, og tískil hevur ikki verið neyðugt við avlúsing, sum sjálvandi fer illa við fiskinum.
- Hetta, sum nú er hent, er sjálvsagt ein strika í rokningini, men hetta mugu vit so taka, sum tað er, leggur stjórin í Mowi, Hans Jákup Mikkelsen, aftrat.
