Nú hava semingsmennini lagt eitt semingsuppskot fyri kommunulæknarnar og Fíggjarmálaráðið. Tað er nú ein lítil vika síðani at semingsmaðurin kom upp í samráðingarnar, og síðani hevur verið dúgliga samráðst.
Fyrr í dag væntaði Terje Sigurðsson, semingsmaður, ikki, at tað fór at eydnast at leggja semingsuppskot fyri partarnar í dag. Men samráðingarnar hava kortini gingið so mikið væl, at í kvøld er eitt uppskot lagt fyri teir.
Partarnir fáa góðar stundir at kanna og meta um semingsuppskotið, tí teir skulu ikki svara semingsmanninum aftur fyrr enn á miðdegi í morgin, fríggjadagin. So tá fáa vit eina greiða ábending um, antin kommunulæknarnir fara í verkfall, ella ikki.
Í løtuni roynir semingsmaðurin eisini at mekla í ósemjuni ímillum arbeiðarafeløgini og arbeiðsgevarafelagið, men Terje Sigurðsson sigur, at enn er alt ov langt ímillum partarnar til at tað er hugsingur um at leggja eitt semingsuppskot fram.
