Kreditmetingarfyritøkan Moody´s hevur eftir øllum eina aðra uppfatan av franska búskapinum enn hin stóra metingarfyritøkan, Standard & Poor's. Í dag kunngjørdi Moody's, at hon hevbur gjørt av at lata Frakland varðveita ta hægstu kreditmetingina, sum er AAA.
Hetta samsvarar ikki við niðurstøðuna hjá Standard & Poor's, sum fyri nøkrum døgum síðani lækkaði franska kreditvirðið úr AAA í AA+.
Moody's sigur í sínari grundgeving, at hóast teir búskaparligu trupulleikarnir í Evropa eru stórir, er ikki grundarlag fyri at lækka virðismetingina. Moody's leggur tó afturat, at støðan kann versna skjótt, um neyðug og munagóð tiltøk ikki verða sett í verk.
