Sonni Ragnar Nattestad og Molde FK, eru í hesum døgum á venjingarlegu í Dubai, har felagið fyrireikar seg til komandi kappingarár.
Sum partur av fyrireikingunum vera fleiri venjingardystir spældir á slíkum venjingarlegum, og í dag spældi Molde venjingardyst móti donsku meistarunum úr FC Keypmannahavn.
Fyri fyrstu ferð í sínum nýggja felagið, fekk Sonni Ragnar Nattestad í dag møguleikan frá byrjan á liðnum hjá Molde.
Dysturin endaði við einum 1-1 javnleiki, eftir at Molde hevði verið á odda 1-0 í hálvleikinum. Av tí at dysturin skuldi avgerast, endaði dysturin við einari brotssparskapping, sum Molde samanlagt vann.
Venjarin hjá Molde, Ole Gunnar Solskjær, var eftir dystin væl nøgdur við sínar dreingir.
- Vit møta í dag besta liðnum í Norðurlondum, so eg eri væl nøgdur við avrikið hjá mínum monnum. Merkisvert er eisini, at tað nærum sótu fleiri leikarar uttanfyri til dystin við smáskaðum, enn tað vóru á vøllinum, men at teir sum í dag fingu møguleikan, loystu hann sera væl. Teir 8-9 sum sótu uttanfyri í dag skulu arbeiða hart fyri at sleppa á liðið aftur, segði Ole Gunnar Solskjær.
Sonni Ragnar Nattestad er eisini nøgdur við sítt egna avrik. Í samrøðu við in.fo, sigur hann.
- Eg haldi at tað gekk væl. Dysturin var ógvuliga strævin, av tí at teir vóru so nógv meira á bóltinum enn hvat vit vóru, men samanumtikið gekk tað væl.
Kappingin í Noregi fer av bakkastokki aftur tann 1.apríl.
