SOSIALURIN-MOLDE: Fótbóltslagið í Molde er einki serligt undan uppgerðini í kvøld á stásiliga stadion ímóti KÍ. Fyri bara tveimum ella trimum árum síðani droymdu teir í Molde um, at fótbóltsliðið hjá teimum skuldi verða alternativið til Rosenborg í Tróndheimi. Teir ikki bara droymdu um tað, men teir royndu eisini at gera nakað við tað. Teir er nakað nógv sagt. Heldur var tað hann, altso Røkke, sum klaksvíkingar kenna so væl frá eit nú Nærabergi. Hann syrgdi fyri, at nýggja og mest stásiliga stadion í Noregi varð bygt, og hann gav fótbóltsfelagnum stórar upphæddir, soleiðis at møguleiki skuldi verða fyri at keypa góðar fótbóltsspælarar. Alt tóktist ganga rætta vegin, og meðan Jákup Mikkelsen var í Molde megnaðu teir at vinna silvurkrónurnar og harvið kvalifisera seg til UEFA Cup kappingina, sum teir í kvøld fara undir.
Nú eru allir dreymar um góða úrtøku í europeisku kappingini burtur. Í hesum kappingarárinum hevur gingið av skriðuni. Eingir pengar eru í kassanum, og tað hevur verið neyðugt atskerja útreiðslurnar. Tað var ein av orsøkunum til, at Jákup Mikkelsen fyri einum mánað síðani segði farvæl. Á ítróttarliga økinum duttu teir mánakvøldið enn longri niður. Tá spældu teir á heimavølli ímóti Bodø/Glimt. Molde hevði nógv spæl, men teir megnaðu ikki at skjóta mál. Gestirnir fingu eitt mál seks minuttir undan steðginum. Í 2. hálvleiki trýsti Molde, teir sendu í tvørtræið, men teir fingu ikki mál. Tá ið tað restaðu tjúgu minuttir skoraði Bodø/Glimt, og vónbrotið í Molde var øgiligt.
Eftir sekstan umfør er Molde fjórði aftast. Teir eru eitt stig frá triði niðasta plássinum, sum ber endaspæl um rættin at halda fram í bestu deildini við sær.
- Aðalmálið hjá okkum í heyst verður at spæla fyri ikki at flyta niður. Tað tykist sum um spælararnir eru pirkaðir ímóti at skjóta mál. Sunnudagin skulu vit spæla sera týdningarmiklan landskappingardyst ímóti Lyn, sum bara er eitt stig aftanfyri okkum. Tá verður tað alneyðugt hjá okkum at fáa stig burturúr og helst at vinna. Skulu vit vinna, so mugu vit finna vegin til málið. Dysturin ímóti KÍ úr Klaksvík skal fyrst og fremst nýtast til at fáa glið á málskjótingina, sigur Molde venjarin Odd Berg.
Hóast tað hevur gingið av skriðuni, so verður í Molde ikki tosað um, at venjarin skal fáa sekkin. Hann fekk starvið, tá ið svenski Gunde Bengtsson fekk sekkin. Tá hevði gingið illa, og tað hevur ikki verið mett at vera nøkur loysn enn eina ferð at geva venjaranum sekkin.
Dreymurin um at røkka langt í UEFA kappingini er langt burtur. Men í Molde halda tey, at tað hevði verið stórt vónbrot, um tað ikki hevði eydnast at vunnið á KÍ. Tað ræður um at skjóta mál. Um tað eydnast, so verða Molde spælararnir ovurfegnir. Málini, sum teir vóna at fáa í kvøld, skulu teir sunnudagin minna seg aftur á, tá ið teir fara á vøllin ímóti Lyn liðnum, ið tá verður komið til hús aftur úr Føroyum, har teir í kvøld fara at spæla ímóti NSÍ.
