Eina ferð um árið hevur Kirkjuliga Heimamissiónini ársmøti. Tá koma fólk, ið eru knýtt at rørsluni, saman at viðgera dagliga arbeiðið og tosað verður um framtíðarætlanir.
Heimamissiónin er ein kirkjulig rørsla við víðfevnandi virksemi, bæði á landi, millum sjófólk og uttanlands.
Heitið á ársmøtinum í ár er "At tæna í trúgv, vón og kærleika". Tænasta hevur altíð verið ein týðandi partur av kristnu trúnni, og er hetta framvegis eitt viðkomandi evni í 2019.
Ársmøtið byrjar longu fríggjakvøldið 5. apríl við einum felags ungdómsmøti, har Jákup E. Petersen talar.
Leygarmorgunin verða tvey upplegg um møguleikar at tæna. Seinnapartin verða ársfrágreiðingar um tað dagliga arbeiðið og fíggjarfrágreiðing.
Í nøkur ár hevur verið arbeitt við at útbyggja Leguhúsið, og sagt verður í tíðindaskrivi, at eitt dato fyri vígsluni av nýggja bygninginum verður avdúkað.
Um kvøldið er møti, har Pól Johannesen talar og kvinnubólkur av Argjum syngur.
