Katrin Dahl Jakobsen, Løgtingskvinna fyri Javnaðarflokkin, vil nú hava at vita frá landsstýriskvinnuni í Almannamálum, hvussu tað ber til, at Nærverkið hvønn mánað rindar 40.000 krónur í leigu fyri eini hús á Argjum, sum als ikki verða brúkt. Tað var Sosialurin í gjár, sum bar tíðindini um, at Nærverkið framvegis rindar fulla leigu fyri húsini á Argjabogagøtu 7 á Argjum, hóast alt virksemið hjá stovninum er flutt. Og í ringasta føri heftir Nærverkið fyri leigu heilt fram til 1. juli í 2012.
Katrin Dahl Jakobsen sigur, at tað er vónleyst at skilja at Nærverkið hvønn mánað missur 40.000 krónur út í tóman heim og nú vil hon hava at vita frá Rósu Samuelsen, hvør hevur ábyrgdina.
Hon vil eisini hava landsstýriskvinnuna at greiða frá, hvussu nógvar tímar í heimahjálp, Nærverkið kundi latið fyri hesa upphæddina.
- Hetta er peningur, sum átti at farið til okkara gomlu, fólk við breki, við menningartarni, og annars øllum tí, sum Nærverkið varðar av, staðfestir Katrin Dahl Jakobsen.
Hon heldur, at hetta er illa atborið atborið, serstakliga í hesum tíðum, tá ið hvør króna verður vend og so nógv verður spart allastaðni.
Myndin er av húsinum á Argjum, sum Nærverkið rindar fulla leigu fyri, hóast tað als ikki verður brúkt.
