Í Kili eru skúlanæmingar og studentar sera misnøgd við, at landsins skúlaskipan er tann sama sum undir einaræðinum hjá Augusto Pinochet, og fyrradagin vóru umleið ein millión ungfólk í verkfalli. Í høvuðsstaðnum Santiago endaði tað við samanbrestum ímillum ungfólkini og løgregluna, og minst 269 fólk vórðu tikin. 24 løgreglumenn fingu skaða.
Eygleiðarar í Santiago siga, at mótmælini eru ein álvarssom avbjóðing hjá tí sosialistiska forsætisráðharranum, Michelle Bachelet, sum tók við fyri trimum mánaðum síðani. Sjónvarpsmyndir hava eisini víst, at løgreglan er farin illa við teimum ungu mótmælisfólkunum, og tað hevur fingið fólk at minnast tað, sum hendi undir einaræðinum, skrivar Reuter.
Tey ungu eru serliga misnøgd við, at stjórnin raðfestir skúlaverkið alt ov aftarlaga við tí úrsliti, at tað er alt ov stórur munur á almennum og privatum skúlum. Stjórnin hevur lovað at játta skúlaverkinum 200 milliónir dollarar afturat, men tey ungu siga, at tað munar ov lítið.
