Petur Mohr, virkisleiðari, sigur, at óstøðuga veðurlagið, sum var herfyri, gjørdi, at fleiri virkir lógu at kalla í fiskaloysi í eina tíð eftir.- Men nú er aftur fiskur á marknaðinum, og sum skilst, hava flestu virkir vælat gera.
Virkini, sum samstarva við Norðís Seafood um eitt nú keyp av fiski, eru Vestís í Sørvági og Sammut í Klaksvík.
- Í Sørvági og í Klaksvík, har virkini virka saltfisk, var heldur frægari við ráfiski í síðstu viku, tí teir dagar, tá ið tað viðraði, kom væl av útróðrarfiski uppá land, sigur hann.
Norðís Seafood keypir meginpartin av ráfiskinum um uppboðssøluna.
Toskurin bíligari
Sum nevnt í aðrari grein, er toskurin fallin nakað í prísi í seinastuni, men eingin vil líka sum viðganga, hví so er.
Vit spurdu Petur Mohr, um lækkaði saltfiskaprísurin er orsøkin til fallið í toskaprísinum, men tað hevði hann einki beinleiðis boð uppá.
- Tað er rætt, at prísurin á toski er fallin nakrar krónur í seinastuni, sigur hann.
