Tann 6. apríl verður stór konsert í Løkshøll. Konsertin hevur heitið Minnast Merle Haggard, og tað er Theodor í Búrstovu, sum er stigtakari. At hjálpa sær at gera tiltakið til veruleika hevur hann havt Teit Midjord.
Theodor í Búrstovu sigur, at honum hevur altíð dámt væl Merle Haggard, og hansara tónleik.
- Eg setti meg í samband við føroyskar countrytónleikarar, og teirmum dámdi væl hugskotið um eina konsert, har vit minnast Merle Haggard. Tey vóru við uppá tað beinanvegin, greiðir Theodor í Búrstovu frá.
Hann fegnast um, at tey fremstu innan føroyskan countrytónleik taka so væl undir við hugskotinum. Eisini heldur hann vera sera hóskandi, at konsertin verður tann 6. apríl, tí Merle Haggard varð føddur 6. apríl í 1937, og hann doyði 6. apríl í 2016.
Tað eru Hallur Joensen, Evi Tausen, Kristina Bærentsen og Magni Christiansen, ið fara á pall í Løkshøll tann 6. apríl, og við sær hava tey fresmtu tónleikarar í landinum.
Fyri at gera eitt gott tiltak betri, skapa samanhang, og fyri seta alt í søguligt ljós, so verður country-køni Petur Rouch frásøgumaður.
Enn er bert ein framførsla sett á skrá, men er tað so, at áhugin er sera stórur, so er pláss fyri einari eykakonsert, siga fyrireikararnir.
