AB hevur gjørt avtalu við 27 ára gamla miðvallaran, Róa Olsen, sum fer at spæla við felagnum restina av kappingarárinum 2024. Tað boðar AB frá.
- Rói er ættaður úr Haldórsvík og uppvaksin í EB/Streymi, har hann hevur spælt 138 dystir í Betrideildini. Hann er ein miðvallari við góðum bóltførleika, hørður skoti og nógvum royndum, ið fer at koma okkara liði til góðar, skrivar AB.
Argjamenn hava havt nógvar skaðar í ár og tað hevur merkt avrikini. Millum annað hava lyklaspælarar á miðjuni verið skaddir.
- Fyrst og fremst er Rói ein sentralur miðvallari, men hann kann eisini spæla í verjuni. Júst á hesum plássum hevur okkara lið verið hart rakt av skaðum í ár. Bjarni Skála, sum vónandi verður klárur heilt skjótt, bleiv álvarsliga skaddur í 2. umfari, meðan Elias El Moustage breyt fótin í dysti í 5. umfari. Harafturat hevur veteranurin í verjuni, Sørin Samuelsen, verið darvaður av skaða, og nú spælir hann ikki fram til summarsteðgin, tí hann er upptikin av arbeiðsørindum í Grønlandi, verður sagt úr AB.
Rói Olsen er yngri beiggi Bárð Olsen, sum er búsitandi á Argjum og spældi í fleiri ár við AB. Komandi dystur hjá AB verður eitt brak av einum dysti í uppflytingarstríðnum, tá FC Suðuroy kemur á vitjan leygardagin 15. juni. Júst hendan dagin letur flytingargluggin í summar upp, so væntanti verður Rói Olsen á fyrsta sinni at síggja í hópinum hjá AB hendan dagin.
